Выхад з грамадзянства Рэспублікі Беларусь асоб, якія пастаянна пражываюць за мяжой
Заява аб выхадзе з грамадзянства Рэспублікі Беларусь складаецца ў адвольнай форме і падаецца ў дыпламатычнае прадстаўніцтва або консульскую ўстанову на імя Прэзідэнта Рэспублікі Беларусь, бо рашэнне аб выхадзе з грамадзянства Рэспублікі Беларусь прымаецца ім.
Да заявы аб выхадзе з грамадзянства Рэспублікі Беларусь прыкладаюцца наступныя дакументы:
- анкета з чатырма фотаздымкамі памерам 30x40 мм;
- аўтабіяграфія;
- копіі старонак пашпарта грамадзяніна Рэспублікі Беларусь, якія змяшчаюць звесткі пра прозвішча, імя, імя па бацьку, дату і месца нараджэння асобы, іншыя адзнакі, за выключэннем віз і штампаў аб перасячэнні мяжы;
- копіі старонак пашпарта грамадзяніна замежнай дзяржавы (калі асоба набыла грамадзянства замежнай дзяржавы на дзень падачы заявы аб выхадзе з грамадзянства Рэспублікі Беларусь) альбо дакумент (даведка) паўнамоцнага органа замежнай дзяржавы аб пацверджанні прадастаўлення асобе грамадзянства дадзенай дзяржавы ў выпадку яго выхаду з грамадзянства Рэспублікі Беларусь;
- копія пасведчання аб нараджэнні заяўніка;
- копіі дакументаў органаў, якія рэгіструюць акты грамадзянскага стану, аб заключэнні (скасаванні) шлюбу заяўнікам;
- квітанцыя аб аплаце консульскага збору або дакумент аб вызваленні ад яго аплаты.
Пры падачы заявы аб выхадзе з грамадзянства Рэспублікі Беларусь сумесна з непаўналетнімі дзецьмі да заявы аднаго з бацькоў прыкладаюцца копіі пасведчанняў аб нараджэнні дзяцей і натарыяльна засведчаная згода кожнага дзіцяці ва ўзросце ад 14 да 18 гадоў на выхад з грамадзянства Рэспублікі Беларусь.
Калі адзін з бацькоў хадайнічае аб выхадзе з грамадзянства Рэспублікі Беларусь сумесна з непаўналетнімі дзецьмі, прад'яўляецца натарыяльна засведчаная згода іншага з бацькоў грамадзяніна Рэспублікі Беларусь на спыненне дзецьмі грамадзянства Рэспублікі Беларусь, альбо даведка органаў унутраных спраў Рэспублікі Беларусь, якая пацвярджае, што іншы з бацькоў пастаянна не пражывае на тэрыторыі Рэспублікі Беларусь.
Бацькі, якія хадайнічаюць аб выхадзе з грамадзянства Рэспублікі Беларусь, могуць выказаць у заяве просьбу аб захаванні грамадзянства Рэспублікі Беларусь іх дзецям.
Калі ў асобы, якая хадайнічае аб выхадзе з грамадзянства Рэспублікі Беларусь, ёсць непаўналетнія дзеці ад шлюбу, які скасаваны, яна павінна прадставіць:
- натарыяльна засведчанаю заяву былога мужа (жонкі) аб наяўнасці або адсутнасці да яго матэрыяльных прэтэнзій.
- копіі дакументаў аб скасаванні шлюбу, смерці аднаго з бацькоў, усынаўленні, пазбаўленні бацькоўскіх правоў, выплаце аліментаў.
Дакументы, выдадзеныя кампетэнтнымі органамі замежных дзяржаў, прымаюцца пры ўмове іх легалізацыі, калі іншае не прадугледжана міжнароднымі дагаворамі Рэспублікі Беларусь, і перакладу на адну з дзяржаўных моў Рэспублікі Беларусь у парадку, прадугледжаным заканадаўствам.
Усе дакументы павінны быць прадстаўлены ў арыгінале з дадаткам трох ксеракопій. Заява, анкета і аўтабіяграфія падаюцца ў трох экзэмплярах.
Консульскі збор за разгляд заявы аб выхадзе з грамадзянства Рэспублікі Беларусь складае 250 еўра.
Аплата ажыццяўляецца толькі пасля прыёму дакументаў супрацоўнікам дыпламатычнага прадстаўніцтва або консульскай установы Рэспублікі Беларусь.
На падставе артыкула 32 Закона Рэспублікі Беларусь ад 1 жніўня 2002 года «Аб грамадзянстве Рэспублікі Беларусь» і Палажэння аб парадку разгляду пытанняў, звязаных з грамадзянствам Рэспублікі Беларусь, зацверджанага Указам Прэзідэнта Рэспублікі Беларусь ад 17 лістапада 1994 г. № 209, дыпламатычныя прадстаўніцтвы і консульскія ўстановы Рэспублікі Беларусь прымаюць заявы аб выхадзе з грамадзянства Рэспублікі Беларусь асоб, якія пастаянна пражываюць за мяжой (гэта значыць аформілі пастаяннае пражыванне за межамі Рэспублікі Беларусь, якое дакументавана пашпартам для пастаяннага пражывання за межамі Рэспублікі Беларус і знаходзяцца на консульскім уліку).